-
«Azərbaycan hökuməti, vətəndaşlarının hüquqlarına hörmət et!», «Azadlıq qazdan daha önəmlidir!», «Xədicə İsmayıla azadlıq!» kimi şüarla dekabrın 10-da Gürcüstanda iki etiraz aksiyası keçirilib.
Aksiya iştirakçıları Azərbaycanda araşdırmaçı jurnalist Xədicə İsmayılın və digər siyasi məhbusların həbsinə etiraz ediblər.
Aksiyalardan biri – Tbilisidə Azərbaycan səfirliyinin, digəri Batumidə Azərbaycan nümayəndəliyinin önündə keçirilib. Aksiya iştirakçısı əllərində gürcü və ingilis dillərində yazılmış plakatlar, Xədicə İsmayılın fotolarını tutublar.
Jurnalist Xədicə İsmayıl dekabrın 5-də 2 ay müddətinə həbs olunub. O, özünü öldürmə həddinə çatdırmada ittiham olunur. Yerli və beynəlxalq təşkilatlar jurnalistin fəaliyyətinə, özəlliklə prezident ailəsinin gizli biznesini üzə çıxaran araşdırmalarına görə həbs edildiyini bildirirlər.
