Azərbaycanın Dağlıq Qarabağda dronları işə saldığı deyilir
Bu gün – avqustun 11-də Azərbaycanın Dağlıq Qarabağda hərbi mövqelərə dronlarla hücum etdiyi bildirilir. Məlumatı AzadlıqRadiosunun Ermənistan xidməti ərazidəki separatçıların "müdafiə nazirliyi"nə əsasən yayıb.
Erməni tərəfdən itki olmadığı deyilir.
Məlumata görə, insidentlər əlaqədar Rusiya sülhməramlı kontingentinə müvafiq informasiya və faktlar təqdim olunub.
Üç erməni sapyoru yaralanıb
Avqustun 11-də "Minalardan təmizləmə humanitar fondu"nun minatəmizləyənləri Dağlıq Qarabağın Xocavənd (Martuni) rayonu ərazisində mühəndis-axtarış işləri zamanı yaralanıblar. "Azatutyun" insidentin kaset bombasının partlaması nəticəsində baş verdiyini yazır.
Xəsarət alanlardan ikisinin vəziyyətinin qənaətbəxş, birinin sabit ağır olduğu bildirilir.
Azərbaycan Naxçıvan və Gədəbəydə mövqelərinin vurulduğunu deyir
Azərbaycan Müdafiə Nazirliyi ( MN) bildirir ki, Ermənistan silahlı qüvvələri Azərbaycan ordusunun mövqelərini atəşə tutub.
Bununla bağlı nazirlik avqustun 11-i gecə saatlarında məlumat yayıb.
Məlumata görə, avqustun 11-i saat 16:20-dən 21:05-dək Ermənistan silahlı qüvvələri mövqelərindən Naxçıvan Muxtar Respublikasının Sədərək rayonunun Heydərabad, Gədəbəy rayonunun Qalakənd və Zamanlı yaşayış məntəqələri istiqamətində Azərbaycan ordusunun mövqelərini müxtəlif çaplı silahlardan, o cümlədən snayperlərlə atəşə tutub. "Azərbaycan Ordusunun şəxsi heyəti arasında həlak olan və yaralanan yoxdur", - məlumatda qeyd edilir.
Nazirlik habelə vurğulayıb ki, qarşı tərəfə cavab verilib.