Martın 6-da Respublika Müalicəvi Diaqnostika Mərkəzinin nəzdində Ürək Mərkəzinin açılışı olub.
Xəbəri AZƏRTAC yayıb.
Xəbərə görə, prezident İlham Əliyev və birinci vitse-prezident Mehriban Əliyeva açılışda iştirak ediblər.
Dövlət başçısı mərkəzin rəmzi açılışını bildirən lenti kəsib.
Xəbərdə qeyd edilir ki, prezident İlham Əliyev və birinci vitse-prezident Mehriban Əliyeva mərkəzdə yaradılan şəraitlə tanış olublar, mərkəzin kollektivi ilə görüşüblər.
XATIRLATMA
Ötən il sentyabrın 26-da Azərbaycanda Konstitusiyaya dəyişikliklə bağlı referendum keçirilib.
Həmin dəyişiklikdən biri də vitse-prezident institutunun təsis edilməsi idi.
Prezident İlham Əliyev fevralın 21-də Mehriban Əliyevanı birinci vitse-prezident vəzifəsinə təyin edib. M.Əliyeva prezidentin həyat yoldaşıdır.
Müxalifət bu təyinatı hakimiyyətin bir ailədə cəmləşməsi kimi dəyərləndirib. Hakimiyyət isə bunu islahat kimi təqdim edir.