Azərbaycan Xarici İşlər naziri Ceyhun Bayramovun rəhbərlik etdiyi nümayəndə heyəti Brüssel şəhərinə yola düşüb.
Bu barədə Azərbaycan Xarici İşlər Nazirliyi dekabrın 17-də məlumat yayıb.
Nazirlik bildirir ki, onlar Azərbaycan-Avropa Birliyi Əməkdaşlıq Şurasının 17-ci iclasında iştirak edəcəklər. İclasın dəqiq tarixi, gündəliyi açıqlanmayıb.
"Səfər çərçivəsində nazir Ceyhun Bayramovun Avropa Birliyi, eləcə də Belçika Krallığının rəsmiləri ilə ikitərəfli görüşlərinin keçirilməsi nəzərdə tutulur", - məlumatda yazılıb.
Azərbaycan Avropa Birliyi ilə "Şərq Tərəfdaşlığı" (ŞT) proqramı çərçivəsində əməkdaşlıq edir.
"Şərq Tərəfdaşlığı" proqramının əsası 2009-cu ildə qoyulub. Proqram AB-nin altı qonşu ölkəsini əhatə edir. Bura Azərbaycan, Gürcüstan, Moldova, Ukrayna, Belarus və Ermənistan daxildir.
Bu ölkələrdən Gürcüstan, Moldova və Ukrayna qurumla assosiasiya sazişi imzalayıb. 2017-ci ilin noyabrında qurumla Ermənistan arasında də tərəfdaşlıq sazişi imzalanıb.
Azərbaycanla da belə sazişin imzalanması ilə bağlı danışıqlar hələ 2017-ci ilin əvvəlindən başlayıb. Ancaq, hələlik, tərəflər arasında tərəfdaşlıq sazişi imzalanmayıb.