Qara dənizdə iki həftəyədək çəkəcək donanma təlimləri başlanır. Bu təlimlər Rusiyanın Ukrayna yaxınlığındakı mübahisəli ərazilərdə ortaya çıxan problemləri cavabsız qoymayacağı xəbərdarlığı ilə bir dönəmə düşür. Ötən həftə Britaniya hərbi gəmisi ilə insident yaşanmışdı.
İllik “Sea Breeze” təlimi iyunun 28-sən iyulun 10-dək 32 ölkənin iştirakıyla gerçəkləşəcək.
Buna da bax: Boris Conson: Britaniya gəmisi Rusiya ilə qarşıdurmada ‘düzgün hərəkət’ edib
ABŞ-ın ev sahibliyi
Təlimlərə bir sıra Qara dəniz ölkələri, NATO müttəfiqləri və tərəfdaşlar qoşulub. Ümumilikdə 5 min əsgər, 32 gəmi, 40 təyyarə və 18 xüsusi əməliyyat və dalğıc komandalarının iştirakı gözlənir.
Bu il dəniz, quru və hava komponentlərinin iştirakıyla təlimlərə Ukrayna və Birləşmiş Ştatlar ev sahibliyi edir.
Rusiya iyunun 23-də bildirib ki, Britaniyanın HMS Defender gəmisinin yoluna atəş açaraq, bomba ataraq onu Krımın Sevastopol şəhəri yaxınlığından uzaqlaşmağa məcbur etmək istəyib.
Britaniyanın Müdafiə Nazirliyi HMS Defender-ə atəş açılmadığını, Rusiyanın ərazidə əvvəlcədən elan olunmuş “artilleriya təlimi” apardığını bildirib. Britaniya Ukraynaya aid və beynəlxalq sularda naviqasiya azadlığından istifadə etdiyini bəyan edib.
Buna da bax: Bir daha Qara dənizdə Rusiya-Britaniya hərbi qarşıdurması barədə
Moskvanın xəbərdarlığı
Moskva bu insidentə cavab olaraq Ukraynanın Krım yarımadası ətrafında iddia etdiyi ərazi sularına girən hərbi gəmilərə atəş açmağa hazır olduğunu bildirib. Rusiya Krımı 2014-cü ilin martında tutub, amma beynəlxalq ictimaiyyət bu addımı tanımayıb.
Rusiyanın Vaşinqtondakı səfirliyi ABŞ və müttəfiqlərini Qara dənizdə hərbi təlimlər keçirməməyə çağırıb, belə manevrlərin “təsadüfi insident riskini artırdığını”, – Ukraynanı cəsarətləndirdiyini deyib.
1⃣ The scale and obviously aggressive nature of the military drills #SeaBreeze in no way match the real security needs in the Black Sea region. Increase risks of unintended incidents. Inspire militaristic ambitions in 🇺🇦#Kiev. pic.twitter.com/kXbtBJ89xk
— Russian Embassy in USA 🇷🇺 (@RusEmbUSA) June 23, 2021
Ukraynanın Xarici işlər naziri Dmitri Kuleba isə ötən həftə deyib ki, Britaniya gəmisi ilə bağlı insident Rusiyanın Qara dəniz və Azov dənizində “aqressiv və provokativ siyasətinin Ukrayna və müttəfiqlərinə davamlı təhdid yaratdığını” göstərir.
Kuleba NATO və alyansa üzv olmaq istəyən Ukrayna arasında Qara dənizdə daha böyük əməkdaşlığa çağırıb.