Prezident Volodimir Zelenski dünya liderlərinə deyir ki, Rusiyanın Ukraynaya qarşı müharibəsini “indi” bitirmək vaxtıdır. O, müddəti bitmək üzrə olan taxıl ixracı sazişini uzatmağa çağırıb.
“Rusiyanın dağıdıcı müharibəsini indi bitirməyin vacibliyinə, bunun mümkün olmasına inanıram”, – Zelenski noyabrın 15-də İndoneziyanın Bali adasında keçirilən G20 sammitinə videomüraciətində deyib.
“Bu, minlərlə həyatı xilas edər”, – xəbər agentlikləri Zelenskinin nitqini yayıblar.
Buna da bax: Qış gəlir. Xersondan sonra nə gözlənirHələ çox döyüş olacaq
O qeyd edib ki, Ukrayna Xerson şəhərindən çıxan Rusiya əsgərlərinin yenidən qruplaşmasına imkan verməyəcək. Prezidentin sözlərinə görə, Ukrayna işğal olunmuş ərazisinə nəzarəti bərpa edənəcən daha çox döyüş olacaq.
Xersonun həftəsonu işğaldan azad edilməsi fevralın sonunda Rusiya hücuma başlayandan bəri Ukraynanın ən böyük uğurlarından biridi.
Zelenski Moskvanı Ukraynadakı qüvvələrinin hamısını geri çəkməyə və Ukraynanın ərazi bütövlüyünü tanımağa çağırıb. O xəbərdarlıq edib ki, Kiyev suverenliyini, ərazisini və müstəqilliyini güzəştə getməyəcək. Zelenski ukraynalı əsirlərin hamısını buraxmağa çağırıb.
Rusiya Prezidenti Vladimir Putin sammitə getməyib, Xarici işlər naziri Sergey Lavrovu göndərib.
Buna da bax: Ailəsini atmış ata müharibədə ölən oğlunun kompensasiyasını istəyirTaxıl sazişi
İyulda BMT-nin vasitəçiliyi ilə əldə olunmuş razılaşma Rusiya hərbi gəmilərinin bağladığı limanlardan Ukrayna taxılının, digər ərzaq məhsullarının daşınmasına imkan verir. Sazişin müddəti noyabrın 19-da başa çatır.
BMT bu saziş çərçivəsində 10 milyon ton taxıl və digər məhsulun daşındığını bildirir. Zelenski deyib ki, sazişin müddəti “müharibənin necə bitməsindən asılı olmayaraq” qeyri-müəyyən vaxtadək uzadılmalıdır.
Ukrayna ordusunun noyabrın 15-də səhər yaydığı məlumata görə, Donetsk vilayətindəki mövqelərə Rusiyanın hücumları dəf olunub.
Ordu Rusiya qüvvələrinin Dnepr çayının sol sahilində müdafiə xətlərini möhkəmləndirdiyini bildirir.