Qarabağ münaqişəsinin həlli üçün aparılan danışıqlara vasitəçilik edən ATƏT-in Minsk Qrupunun həmsədrləri Bernar Fasye (Fransa), Yuri Merzlyakov(Rusiya), Robert Bradke (ABŞ) bu gün yenidən Bakıya gələrək prezident İlham Əliyevlə görüşüblər.
Rəsmi informasiya agentliyi «AzərTAc» bildirir ki, görüşdə Qarabağ münaqişəsinin həlli ilə bağlı danışıqların hazırkı vəziyyəti və perspektivlərinə dair məsələlər ətrafında fikir mübadiləsi aparılıb.
Həmsədrlər elə dünən Bakıda İlham Əliyevlə həmin məsələni müzakirə etmişdilər. Bu gün onlar Yerevanda prezident Serj Sarkisyan və Xarici İşlər naziri Edvard Nalbandyanla görüşdən sonra hansısa səbəbdən yenidən Bakıya dönüblər. Hələlik, rəsmi mənbələrdə bu barədə bir məlumat verilmir.
Bundan əvvəl həmsədrlər Azərbaycan və Ermənistan prezidentlərinin növbəti görüşünü hazırlamaq istədiklərini bildirmişdilər.
