Azərbaycan xəbərləri
Bəhruz Səmədova və Azərbaycanda həbsdə olan digər alimlərə dəstək məktubu yayılıb
Bir qrup alim Azərbaycanda həbsdə olan Bəhruz Səmədov və digər elm adamlarına dəstək məktubunu imzalayıblar. Onlar Azərbaycan hökumətini akademik azadlıqlara sayqı göstərməyə, tələbələri, tədqiqatçıları və jurnalistləri hədəfə almağı dayandırmağa çağırırlar.
Praqadakı Karlov Universitetinin siyasi elmlər üzrə doktorantı B.Səmədov avqustun 23-də Dövlət Təhlükəsizliyi Xidməti (DTX) tərəfindən saxlanılıb, dövlətə xəyanətdə ittiham olunub. O, ittihamı qəbul etmir. Məktub müəllifləri onun məhz akademik və jurnalist yazıları ilə Azərbaycandakı rejimi qəzəbləndirdiyini qeyd edirlər.
Səmədovun Karlov Universitetində doktorluq dissertasiyası Azərbaycanda avtoritarizm və siyasi diskurs barədədir. O, Azərbaycanda baş verənlərə, o cümlədən Ermənistan-Azərbaycan münaqişəsi ilə bağlı hakimiyyətin siyasətinə tənqidi yanaşması ilə fərqlənib.
Qarabağda qələbədən sonra güclənən təzyiq
127 nəfərin imzaladığı məktubda son illər hökumətin jurnalistlərə, müstəqil fikir sahiblərinə, fəallara təzyiqləri gücləndirdiyi, bunun 2020-ci ilin noyabrında İkinci Qarabağ müharibəsində qələbədən sonra daha qabarıq göründüyü vurğulanır. Ötən ilin noyabrından, yəni Azərbaycan ərazi bütövlüyünü tam bərpa edəndən sonra hökumət "AbzasMedia", Kanal13, ToplumTV kimi müstəqil media orqanlarından 10-dan çox jurnalisti saxlayıb.
"2024-cü ilin noyabrında ölkədə keçiriləcək COP29 iqlim konfransı öncəsi rejim tənqidçiləri susdurmaq üçün radikal tədbirlərə əl atır, tələbələri, tədqiqatçıları, sülh fəallarını saxlayır", – məktubda deyilir.
Müəlliflər həmçinin ötən il saxlanmış, bu ilin aprelində ev dustaqlığına buraxılan iqtisadçı Qubad İbadoğlunun, ötən ilin avqustunda İstanbulda saxlanılaraq Bakıya gətirilən iqtisadçı Fazil Qasımovun, bu ilin mayında saxlanılan iqtisadçı Fərid Mehralızadənin, iyulda saxlanılan etnoqraf İqbal Əbilovun adlarını çəkirlər.
Azərbaycan hakimiyyəti ölkədə siyasi motivli həbslərin olmadığını deyir. Ancaq ölkə bir sıra beynəlxalq insan haqları reytinqlərində də aşağı yerləri tutur.
Vaslav Havel Mükafatı namizədlərinin arasında Akif Qurbanov da var
Vaslav Havel İnsan Haqları Mükafatının seçmə paneli 2024-cü ilin mükafatına namizədlərin ilkin siyahısını elan edib.
Praqada mənzillənən palataya dünya üzrə insan haqlarının müdafiəsi sahəsində müstəqil fiqurlar daxildir.
Palataya Avropa Şurası Parlament Assambleyasının prezidenti Teodoros Rusopulos sədrlik edir.
Hazırda qısaldılmış siyahıya daxil edilmiş üç namizəddən biri Azərbaycandandır.
İnsan haqları müdafiəçisi, siyasi fəal və Azərbaycan vətəndaş cəmiyyətinin fəal üzvü Akif Qurbanov Demokratik Təşəbbüslər İnstitutunun və Üçüncü Respublika Platformasının qurucu üzvlərindən biri və spikeridir. O 2024-cü ilin martında, Azərbaycanda jurnalist və fəalları hədəfləyən həbslər dalğası əsnasında həbs olunub.
Namizədlər siyahısına habelə Venesuela müxalifətinin lideri Mariya Korina Maçado və Gürcüstandan aparcı feminist fəal Babutsa Pataraya daxildir.
Palatanın ilkin seçimini elan edən AŞPA prezidenti insan haqlarını, bəzən hətta həyatları bahasına müdafiə edənlərə dərin təşəkkürünü bildirib.
2024-cü il üçün Vaslav Havel Mükafatının yekun laureatı sentyabrın 30-da AŞPA-nın payız sessiyasının plenar iclasında elan ediləcək. Mükafat 60 min avro, kubok və diplomdan ibarətdir.
Xatırlatma
Bu mükafat Avropada və onun hüdudlarından kənarda insan haqlarının müdafiəsi üçün vətəndaş cəmiyyəti üzlərinin müstəsna fəaliyyətinə görə verilir.
Vaslav Havel İnsan Haqları Mükafatı təsis edildiyi gündən bəri Osman Kavalaya (2023), Vladimir Kara-Murzaya (2022), Mariya Kalesnikavaya (2021), Luajen Alhatlula (2020), İlham Tohtiyə (2019), Oyub Titiyevə (2018), Murat Arslana (2017), Nadia Murada (2016), Lyudmila Alekseyevaya (2015), Anar Məmmədliyə (2014) və Ales Byalyatsiyə (2013) verilib.
Putinlə Əliyev Ermənistan-Azərbaycan sülh sazişinin hazırlanmasını müzakirə ediblər
Rusiya prezidenti Vladimir Putin ilə Azərbaycan prezidenti İlham Əliyev arasında telefon danışığı olub. Bu barədə Kremlin rəsmi saytında məlumat yerləşdirilib.
Məlumatda deyilir ki, liderlər Rusiya prezidentinin Azərbaycana ötənhəftəki səfərinin uğurlu nəticələrindən məmnunluq bildiriblər. Qeyd ediblər ki, danışıqlar zamanı əldə olunan razılaşmaların ardıcıl gerçəkləşdirilməsi Rusiya-Azərbaycan arasında müttəfiqlik və tərəfdaşlıq əlaqələrinin daha da dərinləşməsinə töhfə verəcək.
Kreml bildirir ki, Cənubi Qafqazda mövcud vəziyyətin fərqli aspektləri, o cümlədən Azərbaycan-Ermənistan sülh sazişinin hazırlanması, sərhədin delimitasiya və demarkasiyası, iki ölkə arasında nəqliyyat kommunikasiyalarının açılması müzakirə edilib. Rusiya tərəfi Bakı və Yerevan arasında uyğun qarşılıqlı məqbul qərarların hazırlanmasına mümkün töhfəni verməyə hazır olduğunu vurğulayıb.
+++
Azərbaycan Prezidenti Mətbuat xidmətinin məlumatına görə, telefon danışığı zamanı Azərbaycanın Qərb rayonları və Naxçıvan Muxtar Respublikası arasında nəqliyyat dəhlizinin açılması ilə bağlı fikir mübadiləsi aparılıb.
Tərəflər həmin yolun Ermənistanın Sünik bölgəsindən keçməsini nəzərdə tutur. Rusiya orada yola onun nəzarət etməsini istəyir, amma Ermənistan buna qarşıdır. Ermənistan hökumətinin fikrincə, bu yol onun suverenliyinə xələl gətirməməlidir.
+++
Rusiya prezidenti avqustun 18-19-da Bakıda səfərdə olub. O, səfər zamanı demişdi ki, Ermənistan və Azərbaycana sülh müqaviləsinin imzalanmasında, sərhədin delimitasiyasında kömək göstərə bilər. Sonradan Putin avqustun 23-də Ermənistanın baş naziri Nikol Paşinyanla telefon söhbətində oxşar fikirlər səsləndirib.
Azərbaycan 2020-ci ildə 44 günlük müharibə, 2023-cü ildə birgünlük əməliyyatla Qarabağ üzərində nəzarətini, ərazi bütövlüyünü bərpa edib. Amma tərəflər sülh sazişi imzalamayıb, sərhədlər demarkasiya olunmayıb. Son illər həm Rusiya, həm də Qərbin vasitəçiliyi ilə sülh danışıqları aparılıb.
Hesabat: 'Bir ildə siyasi məhbusların sayı 100-dən çox artıb'
Azərbaycanda son bir ildə - 2023-cü il iyulun 31-dən 2024-cü il iyununa kimi siyasi məhbusların sayının 100-dən çox artdığı bildirilir.
Bu barədə Siyasi Məhbusların Monitorinqi Mərkəzinin "Hüquqi Azərbaycan" hesabatında bəhs edilir.
"Hazırda cəzaçəkmə yerlərində siyasi motivlərlə həbs olunan ən azı 303 nəfər saxlanılır", - hesabatda əlavə edilir.
Hesabatda vurğulanır ki, "siyasi məhbusların əksəriyyəti dindarlardır, lakin son bir ildə həbs olunan fəalların və jurnalistlərin sayı kəskin şəkildə artıb".
2024-cü ilin mayında Azərbaycan prezidenti 154 nəfərin əfv edilməsi haqqında sərəncam imzalayıb. Lakin bu sərəncam siyasi məhbus siyahılarında yer alan heç bir şəxsə şamil edilməyib.
Siyasi Məhbusların Monitorinq Mərkəzini 2014-cü ilin oktyabrında bir qrup keçmiş "vicdan məhbusu" yaradıb.
Hələlik, hesabata rəsmi qurumlardan münasibət almaq mümkün olmayıb.
Azərbaycanda siyasi məhbus sayılan şəxslərlə bağlı vahid siyahı yoxdur. Bir sıra hüquq müdafiəçilərinin hazırladıqları belə siyahılarda 300-dən, bəzilərində isə hətta 100-dən az məhbusun adı yer alır.
Təkcə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.
Azərbaycan rəsmiləri isə ölkədə siyasi məhbusların olması ilə bağlı deyilənləri qəbul etmirlər. Onların vurğulamasına görə, siyasi məhbus siyahılarında yer alan şəxslər sırf törətdikləri əmələ görə məsuliyyətə cəlb ediliblər.
Azərbaycanda son aylar jurnalist və fəalların artan həbsi ilə bağlı Avropa İttifaqının açıqlamasına Azərbaycan Xarici İşlər Nazirliyindən belə cavab vermişdilər: "Azərbaycanda hər hansı bir vətəndaşın siyasi əqidəsinə, fikirlərinə görə təqib olunduğu, özlərini jurnalist və ya hüquq müdafiəçisi kimi təqdim edən şəxslər barədə cinayət işlərinin siyasi motivli olduğuna dair fikirlər kökündən yanlışdır".
Deputatlığa namizəd Nəsiman Yaqublu seçicilərlə görüşdən qayıdanda həlak olub
Dünən, avqustun 25-də Bakı Dövlət Universitetinin müəllimi, deputatlığa namizəd Nəsiman Yaqublunun avtomobil qəzası nəticəsində öldüyü açıqlanıb.
Qəzanın onun namizəd olduğu 125 saylı Zəngilan-Qubadlı seçki dairəsinin seçiciləri ilə görüşmək məqsədilə Zəngilan rayonuna etdiyi səfərdən geri dönərkən Cəbrayıl rayonu ərazisində baş verdiyi bildirilir.
Daxili İşlər Nazirliyi (DİN) Mətbuat xidmətinin məlumatına görə, N.Yaqublu idarəetməni itirərək maşını yol kənarına aşırıb: "Nəsiman Yaqublu müxtəlif dərəcəli bədən xəsarətləri alaraq xəstəxanaya çatdırılıb. Tibbi müdaxilələrə baxmayaraq onun həyatını xilas etmək mümkün olmayıb. Faktla bağlı araşdırma aparılır".
Müsavat: “Müəmma var”
Ölümlə bağlı onun ailəsi hər hansı açıqlama yaymayıb.
Üzv olduğu Müsavat Partiyasından isə bildiriblər ki, ölümdə müəmmalar var.
"Çünki dümdüz yolda qəza niyə olmalıdır? Nəsiman bəy də gənclikdən maşın sürən bir adam olub. İkinci məsələ ondan ibarətdir ki, qəzaya düşəndən sonra o, xəstəxanaya çox gec çatdırılıb", - deyə partiyadan qeyd edib.
Partiyadan vurğulayıblar ki, qəza Cəbrayıl rayon ərazisində baş verib:
“Orada xəstəxana olmadığı üçün onu gətiriblər Füzuliyə. Hadisə yerindən xəstəxanaya qədər yarım saatlıq yoldur. Amma Nəsiman bəy xəstəxanaya təxminən 1 saat 20 dəqiqədən sonra çatdırılıb. Ona görə də ölüm səbəblərinin araşdırılması çox vacibdir".
Lakin partiyadan bu deyilənlərə, rəsmi qurumlardan, hələlik, münasibət öyrənmək mümkün olmayıb.
Artıq Nəsiman Yaqublunun ölümü ilə bağlı cinayət işi başlanılıb.
Cəbrayıl Rayon Polis Şöbəsində Cinayət Məcəlləsinin 263.2-ci ( Yol hərəkəti və ya nəqliyyat vasitəsinin istismarı qaydalarının pozulması-ölümlə nəticələndikdə) maddəsi ilə istintaq aparılır.
Nəsiman Yaqublu kimdir?
N.Yaqublu 1962-ci il fevralın 22-də Zəngilan rayonunun Zəngilan kəndində doğulub. Orta məktəbi bitirdikdən sonra Bakı Dövlət Universitetinin Jurnalistika fakültəsində təhsil alıb.
1983-cü ildə təhsilini davam etdirmək üçün Rusiyaya gedib və Sankt-Peterburq Universitetinin Jurnalistika fakültəsində oxuyub.
N.Yaqublu 1990-cı ildə stalinizmin qurbanları haqqında "Ağrılı ömürlər" kitabını, 1991-ci ildə isə Azərbaycan Xalq Cümhuriyyəti və onun yaradıcısı olan Məhəmməd Əmin Rəsulzadə haqqında əsərini nəşr etdirib.
2001-ci ildə "Azərbaycan Milli İstiqlal mübarizəsi və Məhəmməd Əmin Rəsulzadə" mövzusunda namizədlik dissertasiyasını, 2014-cü ildə "Azərbaycan milli istiqlal mücadiləsi və mühacirət mətbuatı" mövzusunda doktorluq dissertasiyasını müdafiə edib.
O, 1993-cü ildən Bakı Dövlət Universitetinin Jurnalistika fakültəsində baş müəllim olaraq fəaliyyət göstərib.
N.Yaqublu namizədliyini müxalifətdə olan Müsavat Partiyasindan vermişdi.
Xatırlatma
Azərbaycanda sentyabrın 1-də növbədənkənar parlament seçkiləri keçiriləcək.
Seçkilərin bu ilin noyabrında keçiriləcəyi gözlənirdi. Hakim Yeni Azərbaycan Partiyası (YAP) həmin ay ölkədə BMT-nin iqlim konfransının (COP29) keçiriləcəyini səbəb göstərərək parlamentin vaxtından əvvəl buraxılması təşəbbüsü ilə çıxış edib. Təşəbbüs parlamentdə qəbul edilib.
Bundan əvvəlki parlament seçkiləri də Azərbaycanda növbədənkənar olub. Onda parlament seçkilərinin önə çəkilməsi "prezidentin apardığı islahatlarla ayaqlaşmaq istəyi" ilə izah edilmişdi.
Bir sıra müxalifət partiyaları isə bəyan etmişdi ki, hakimiyyət seçkiləri önə çəkməklə onu tələsik saxtalaşdırıb.
Qardaşı: 'Ələsgər Məmmədliyə cərrahi əməliyyat lazımdır'
Qardaşı Nəsimi Məmmədli bildirir ki, həbsdə olan "Toplum" internet televiziyasının təsisçisi Ələsgər Məmmədliyə cərrahi əməliyyat lazımdır.
N.Məmmədli deyir ki, bu gün, avqustun 26-da Ə.Məmmədli ilə telefonla danışıb: "Boğulma halları qalıb və bu məsələdə heç bir pozitiv dinamika yoxdur. Qalxanabənzər vəzində olan şiş cərrahi əməliyyatla götürülməlidir. Amma indiki şəraitdə bu, təəssüf ki, məqsədəuyğun deyil".
Onun sözlərinə görə, həmin şişin olması qardaşının səhhətinə ciddi ziyan vurur: "Qan təzyiqi yenə gah yuxarı qalxır, gah aşağı enir, qardaşım başağrısından əziyyət çəkir".
Qardaşının bu açıqlamasına, hələlik, rəsmi qurumlardan münasibət almaq mümkün olmayıb.
Yaxınları bundan əvvəl də bir neçə dəfə Ə.Məmmədlinin səhhətindən narahat olduqlarını açıqlayıblar.
Ə.Məmmədli bu il martın 8-də həbs olunub. Xətai rayon Məhkəməsi onun barəsində 4 aylıq həbs-qətimkan tədbiri seçib. Daha sonra qətimkan tədbirinin müddəti daha 3 ay uzadılıb.
Ə.Məmmədli Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ittiham olunur. O, özünü təqsirli bilmir və həbsini peşə fəaliyyəti ilə əlaqələndirir.
Xatırlatma
Ümumilikdə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 250-300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
İqbal Əbilovdan xəbər var
Ötən ay milli ədavətin qızışdırılması və dövlətə xəyanət ittihamı ilə həbs edilən 'Talış Milli Akademiyasının xəbərləri'nin baş redaktoru İqbal Əbilov bugün, avqustun 23-də valideynlərinə zəng vurub. Bu barədə AzadlıqRadiosuna onun atası Şahin Əbilov məlumat verib.
Atasının vurğulamasına görə, istintaq oğluna valideyinləri ilə əlaqə saxlamasına məhdudiyyət qoymuşdu:
“Məhdudiyyət götürülüb. Düzdür, hələlik, görüşməmişik,amma telefonla danışdıq”.
Atasının bu dediklərinə, hələlik, rəsmi qurumlardan münasibət almaq mümkün olmayıb.
***
İyulun 31-də Bakı Apellyasiya Məhkəməsində 'Talış Milli Akademiyasının xəbərləri'nin baş redaktoru İqbal Əbilovun həbsindən verilən şikayətə baxılıb. Amma şikayət təmin edilməyib. Müdafiə tərəfindən verilən məlumata görə, o, ittihamları rədd edib.
“İqbal Əbilov bildirdi ki, o, sırf elmi fəaliyyət və tədqiqatla məşğul olub. O, ittihamı, ümumiyyətlə, başa düşmədiyini bildirdi”, – deyə vəkil Rövşanə Rəhimova qeyd edib.
Müdafiə tərəfi də hesab edir ki, ittihamın maddi hüquqi əsası yoxdur və yalnız istintaqın subyektiv fərziyyələrinə əsaslanır. Vəkil bildirib ki, Əbilovun hüquqlarının müdafiəsi və bərpası üçün bütün hüquqi addımlar atılacaq.
"Oğlum siyasətlə məşğul olmayıb"
İyulun 24-də Səbail rayon Məhkəməsi İ.Əbilov barəsində 4 ay müddətinə həbs-qətimkan tədbiri seçmişdi. O, Cinayət Məcəlləsinin 283 (milli ədavətin qızışdırılması) və 274 (dövlətə xəyanət) maddələri ilə ittiham olunur.
Onun atası Şahin Əbilov da deyirdi ki, İ.Əbilov ona qarşı irəli sürülən ittihamları qəbul etmir.
O əlavə edib ki, oğlu uşaqlıqdan Belarusda yaşayıb: "Oğlum siyasətlə məşğul olmayıb. O, geniş elmi araşdırmalar aparıb. Onun tədqiqatları təkcə talışlarla bağlı deyil, Çindən Türkiyəyə qədər bütün geniş regiona aid olub".
Bəzi yaxınları isə onun həbsini müxtəlif milli azlıqlar, o cümlədən Azərbaycan talışları ilə bağlı araşdırmaları ilə izah edirlər.
Atasının və yaxınlarının bu açıqlamasına, hələlik, rəsmi qurumlardan münasibət almaq mümkün olmayıb.
Amma yerli saytlarda yer alan iddialara görə, İ.Əbilov üçüncü ölkə ərazisində məskunlaşıb xarici xüsusi xidmət orqanının tapşırıqlarını icra etməklə dövlətə xəyanətdə, Azərbaycan ərazisində etnik zəmində nifrət və düşmənçiliyin salınmasına yönələn hərəkətlərdə təqsirləndirilir.
DTX saxlayıb
Belarusdan Azərbaycana məzuniyyətə gələn Azərbaycan vətəndaşı İ.Əbilovu iyulun 22-də Masallı rayonunun Bala Kolatan kəndində Dövlət Təhlükəsizliyi Xidmətinin (DTX) əməkdaşları saxlayıb.
35 yaşlı İ.Əbilov virtual "Talış Milli Akademiyası"nın mətbu orqanı olan "Talış Milli Akademiyasının xəbərləri"nin baş redaktorudur. Saytda talış folklor nümunələri, talışlarla bağlı nəşr olunmamış tarixi sənədlər, tədqiqatlar dərc edilib.
İ.Əbilov Belarus Dövlət Universitetinin Beynəlxalq münasibətlər ixtisası üzrə 2012-ci ildə bakalavr, 2013-cü ildə isə magistraturasını bitirib. 2016-cı ildə həmin universitetin aspiranturasına daxil olub.
İctimai fəal Səməd Şıxı sərbəst buraxılıb
Avqustun 23-də Bakı hava limanında Tbilisiyə gedərəkən dostlarına saxlandığını bildirən yazıçı, ictimai fəal Səməd Şıxı bu gün, avqustun 24-də sərbəst buraxıldığını açıqlayıb.
Amma S.Şıxı heç bir təfərrüat barədə danışmaq istəmədiyini qeyd edib.
Məsələ ilə bağlı hüquq mühafizə orqanları ilə də, hələlik, danışmaq mümkün olmayıb.
***
Azərbaycanda yaxınları yazıçı, ictimai fəal Səməd Şıxının avqustun 23-də saxlandığını bildirirlər.
Onların verdiyi məlumata görə, S. Şıxı Gürcüstan paytaxtı Tbilisiyə gedərkən Bakı hava limanında saxlanıb. "Səməd nəzarətdən keçib, amma yarım saatdan sonra bizə saxlandığını yazdı. Haradasa saat 16:43-də. Daha sonra ona zəng çatmadı", deyə yaxınları vurğulayıb.
S. Şıxının dostları hazırda onun barəsində hər hansı məlumat ala bilmədiklərini qeyd edirlər.
Hələlik, onun taleyinə hüquq-mühafizə orqanlarından da aydınlıq gətirmək mümkün olmayıb.
Ötən il avqustun 11-də Səməd Şıxı Abşeron Rayon Polis İdarəsinin Qobu qəsəbəsində yerləşən bölməsinə aparıldığını və sonra da sərbəst buraxıldığını bildirmilşdi. O bunu yazdığı statuslarla izah etmişdi. Amma həmin məsələyə onda Daxili İşlər Nazirliyindən konkret münasibət almaq mümkün olmamışdı.
Dövlətə xəyanət ittihamı ilə həbs
S.Şıxının bundan əvvəl müharibə əlehinə mövqeyi ilə diqqət çəkdiyi bildirilirdi. Bu gün, avqustun 23-də Bakının Sabail rayon Məhkəməsində başqa bir müharibə əleyhdarı olan politoloq Bəhruz Səmədov haqqında isə 4 aylıq həbs qəti imkan tədbiri seçilib. O, Cinayət Məcəlləsinin 274-ci maddəsi (dövlətə xəyanət) ilə ittiham edilir.
B.Səmədov məhkəmədə özünü təqsirli bilməyib. O, Azərbaycan və Ermənistan arasında 2020-ci ildə 44 günlük savaş və ötən il Qarabağda keçirilən bir günlük hərbi əməliyyatlar zamanı rəsmi Bakının mövqeyi ilə üst-üstə düşməyən açıqlamalar vermişdi. Həmin hərbi əməliyyatlar zamanı rəsmi Bakı bütün ölkə ərazisində suverenliyin bərpa olunduğunu açıqlayıb. Üstəlik, rəsmi Bakı Qarabağda birgünlük hərbi əməliyyatı "lokal antiterror tədbirləri" adlandırmışdı. Ermənistan isə Qarabağda keçirilən əməliyyatı "etnik təmizlənmə" sayırdı. Həmin əməliyyatdan sonra Qarabağdan erməni əhali köç edib. B.Səmədov ötən il açıqlamalarının birində vurğulamışdı ki, Azərbaycan hökumətinin dialoq yox, güc tətbiq etməsi onun demokratik olmasına mane olur.
Anar Məmmədlinin həbs müddəti artırıldı
Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin həbs müddəti 3 ay uzadılıb.
Bununla bağlı avqustun 22-də Xətai rayon Məhkəməsi istintaq orqanın vəsatətinə baxaraq qərar çıxarıb.
A.Məmmədlinin vəkillərinin sözlərinə görə, istintaq müddətinin uzadılması üçün heç bir əsas yoxdur. "Qərardan apellyasiya şikayəti veriləcək", - onlar vurğulayıblar.
A.Məmmədli aprelin 29-da saxlanıb. Aprelin 30-da Xətai rayon Məhkəməsi onun barəsində 3 ay 28 gün müddətinə həbs-qətimkan tədbiri seçib.
A.Məmmədli Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur. O, ittihamı qəbul etmir.
Bundan əvvəl
Seçkilərin Monitorinqi və Demokratiyanın Tədrisi Mərkəzinin (SMDT) rəhbəri A.Məmmədli bundan əvvəl 2013-cü ilin sonlarında saxlanıb. O, vergidən yayınma və başqa ittihamlar ilə 5 il 6 ay müddətə həbs edilib. Amma ittihamları qəbul etməyib. Bir sıra yerli və beynəlxalq təşkilatlar onu siyasi məhbus kimi tanıyıblar.
Məmmədli 2016-cı il martın 17-də əfv sərəncamı ilə azadlığa buraxılıb. SMDT o, azadlığa çıxdıqdan sonra da fəaliyyət göstərib. Azərbaycanda bir çox seçkilərin monitorinqini aparan bu təşkilatın hesabatları, bir qayda olaraq, tənqidi xarakter daşıyıb. Azərbaycan rəsmiləri isə ölkədə seçkilərin azad və ədalətli keçirilmədiyinə dair tənqidləri qəbul etmir.
Təqribən 10 gün sonra, sentyabrın 1-də Azərbaycanda parlament seçkiləri keçirilməlidir.
Xatırlatma
Ümumilikdə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Bugünlərdə isə onların bəzilərinin ittihamı daha bir neçə maddə ilə ağırlaşdırılıb. Söhbət külli miqdarda gəlir əldə etməklə qanunsuz sahibkarlıqdan, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 250-300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Xanımı bildirir ki, Ülvü Həsənli həbsdə ölümlə hədələndiyini deyir
"AbzasMedia" nəşrinin həbsdəki direktoru Ülvi Həsənlinin xanımı Rubabə Quliyeva deyir ki, əri saxlandığı 1 saylı Bakı İstintaq Təcridxanasında ölümlə hədələndiyini bildirir.
R.Quliyevanın sözlərinə görə, avqustun 21-də Ü.Həsənli onunla növbəti telefon danışığında bildirib ki, işgəncə faktları barədə yazandan sonra kamerasındakı bir nəfər ona qarşı xüsusilə təxribat xarakterli hərəkətlər edir: "Hətta bir neçə dəfə cibindən kəsici alət çıxararaq Ülvini hədələyib".
R.Quliyeva qeyd edib ki, bu məsələ ilə bağlı həm Ü.Həsənli, həm də vəkili Zibeydə Sadıqova təcridxana rəisinə, rəis müavininə 10 gündən çoxdur şikayətlərini ünvanlasalar da, heç bir tədbir görülməyib: "Ombudsman Aparatının, Penitensiar Xidmətin dərhal bu işi araşdırmasını, Ülvinin təhlükəsizliyini təmin etməsini tələb edirəm".
Penitensiar Xidmətdən cavab
Penitensiar Xidmətdən "AbzasMedia" nəşrinin həbsdəki direktoru Ülvi Həsənlinin xanımı Rubabə Quliyevanın açıqlamasına münasibət bildiriblər.
Qurumdan "Turan"a deyiblər ki, penitensiar müəssisələrdə saxlanılan məhkum və həbs edilmiş şəxslərin bütün hüquqları, o cümlədən şəxsi təhlükəsizlik hüquqları təmin olunur, qanuni mənafeləri qorunur: "Ülvi Həsənli, onun hüquqlarını müdafiə edən vəkilləri tərəfindən Penitensiar Xidmətə, eləcə də Bakı İstintaq Təcridxanasına ona qarşı qanunsuzluqlarla bağlı heç bir rəsmi müraciət və məlumat daxil olmayıb".
+++
Ötən ay Ü.Həsənli 1 saylı Bakı İstintaq Təcridxanasında işgəncələrin olması ilə bağlı açıqlama yaymışdı. Orda vurğulanırdı ki, "bəzi məhbusları çarmıxa çəkib döyür, dəhlizlərdəki reşotkalardan asırlar".
O, müraciətində qeyd edirdi ki, dəfələrlə Penitensiar Xidmətin, İstintaq Təcridxanasının rəhbərliyinə, Ombudsmana müraciət etsə də, heç bir tədbir görülməyib.
Öz növbəsində Penitensiar Xidmətdən bildirmişdilər ki, bu müraciətdə deyilənlər reallığa uyğun gəlmir.
Xatırlatma
Ü.Həsənli və daha bir neçə "AbzasMedia" əməkdaşı 2023-cü ilin noyabrında valyuta qaçaqmalçılığı ittihamı ilə həbs edilib.
Onların işi üzrə istintaq davam edir. Bugünlərdə isə onların ittihamı daha bir neçə maddə ilə ağırlaşdırılıb. Söhbət külli miqdarda gəlir əldə etməklə qanunsuz sahibkarlıqdan, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir.
Ümumilikdə isə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 250-300 siyasi məhbus var.
Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Dron hücumundan sonra Rostovdakı neft bazasında yanğın üçüncü gündür ki, davam edir
Rusiyanın Rostov vilayətindəki neft bazasında ötən bazar başlanmış yanğını söndürmək hələ də mümkün olmayıb.
Üç sutkadır ki, davam edən yanğın hazırda 10 min kvadrat metri əhatə edir.
Neft bazasının yerləşdiyi Proletarsk rayonunda səmanı qara tüstü örtüb.
TASS xəbər verir ki, yanğının söndürülməsinə 500 nəfər cəlb edilib. Bundan əvvəlki günlərdə yanğını üç yanğınsöndürən qatarın və 80 xüsusi maşının köməyi ilə dayandırmağa çalışırdılar. Bu da xəbər verilir ki, yanğının söndürülməsi üçün xüsusi aviasiya hazırlanır.
Bundan əvvəl
Rostov vilayətinin Proletarsk rayonundakı neft bazasında yanğının söndürülməsi zamanı Fövqəladə Hallar Xidmətisinin 18 əməkdaşı xəsarət alıb. Həkimlər onların vəziyyətini “ağır” olaraq qiymətləndiriblər.
Rostov vilayətinin qubernatoru Vasili Qolubev bildirib ki, Ukraynanın dron hücumu nəticəsində başlanmış yanğını artıq ikinci sutkadır ki, söndürmək mümkün olmur.
Proletarsk rayonunda fövqəladə vəziyyət rejimi elan edilib.
Rayon administrasiyasının başçısı Valeri Qoriç deyib ki, "hələlik heç nə dəyişməyib, yanğının sahəsini azaltmaq olmur”.
Bu yaxınlarda Rostov şəhərinin sənaye zonasının ərazisi Ukrayna dronlarının hücumuna məruz qalmışdı. Proletarskdakı yanğının başlanmasına da elə bu səbəb olub. Region rəhbərliyi bildirir ki, vurulan dronların qırıntıları yanacaq çənlərinin üstünə düşüb. Bunun dərhal ardınca daha bir dron hücumu olub və yanğının söndürülməsi bu səbəbdən dayandırılıb.
Ukrayna silahlı qüvvələri bildirir ki, Proletarskdakı neft bazasına dron hücumunu Ukrayna hərbi kəşfiyyatı həyata keçirib.
Son bir neçə ayda Proletaskdakı bazaya bir neçə dəfə hücumlar edilib.
Üçüncü körpü də dağıdılıb?
Bu arada Rusiyanın hərbi blogerləri Vladimir Romanov və Yuri Podalyaka yazıblar ki, Ukrayna hərbçiləri Kursk vilayətində, Seym çayı üzərindəki üçüncü körpünü də dağıdıblar.
Kursk vilayəti qubernatorunun müşaviri Roman Alyoxin Podolyakanın xəbərinə istinad etsə də, onu “yoxlanmış məlumat” adlandırıb.
Xəbər verilir ki, Rusiya hərbçiləri hazırda çaydan keçmək üçün ponton körpülərindən istifadə edirlər.
Körpünün dağılmasına dair rəsmi xəbər yoxdur. Ukrayna tərəfi də bu xəbəri hələ ki, şərh etməyib.
Seym çayı üzərindəki birinci körpü avqustun 16-da, ikinci körpü isə avqustun 18-də dağıdılıb. Hər iki körpünün dağıdılması üçün məsuliyyəti öz üzərinə Ukrayna tərəfi götürüb.
Blogerlər Krıja kəndi yaxınlığındakı körpünü sonuncu körpü adlandırırlar, amma Kekino kəndi yaxınlığında daha bir körpünün olduğu deyilir. Podolyakanın sözlərinə görə bu körpü tam olaraq Ukrayna ordusunun atəş nəzarəti altındadır.
Ukrayna prezidenti Volodimir Zelenski deyib ki, Ukrayna ordusunun əsas vəzifəsi Kursk vilayətində “bufer zonası” yaratmaqdır.
Ukrayna körpüləri dağıdır
Bundan əvvəl verilən xəbərlərdə deyilirdi ki, Ukrayna silahlı qüvvələrinin komandiri deyir ki, Rusiyanın Kursk vilayətində ikinci körpü vurulub. Kiyev Rusiyanın bu ərazidə döyüş əməliyyatlarını zəiflətməyə çalışır.
"Daha bir körpünü çıxaq", – Hava qüvvələrinin komandiri Mikola Oleşçuk avqustun 18-də Telegram-da yazıb.
"Hava qüvvələri dəqiq hava zərbələri ilə düşməni logistika qabiliyyətindən məhrum etməkdədir, bu isə əməliyyatların gedişatına ciddi təsir göstərir", – komandir yazır.
Moskva bu zərbə ilə bağlı şərh verməyib. Ukrayna iki həftəyə yaxındır Rusiyanın Kursk vilayətinə qəfil əks-hücuma keçib ki, bu isə iki il yarımdır gedən müharibənin dinamikasını dəyişib, 120 min nəfər evini tərk etməli olub.
Vurulan körpü
Rusiya hərbi bloqerləri əvvəlcə vurulan birinci körpünün fotosunu yerləşdiriblər. Bu körpü Kurskdakı Zvannoye kəndi yaxınlığından keçən Seym çayı üzərindədir.
Rusiya təhlükəsizlik rəsmilərinin sözlərinə görə, bu körpünün dağıdılması Qluşkov rayonunun bir hissəsi ilə əlaqəni kəsib, bu da regiondakı mülki evakuasiyanı çətinləşdirib.
Avqustun 16-da Rusiya Xarici İşlər Nazirliyi Ukraynanı Amerikanın uzaqmənzilli raketləri ilə Qluşkovdakı əsas körpünü dağıtmaqda, bu zaman mülkilərin evakuasiyasına kömək edən könüllüləri öldürməkdə ittiham edib.
Təhlilçilərin fikrincə, Seym üzərində körpülərin vurulması Ukraynaya Kurskda hücumu üçün təhlükəsiz cinah təmin etməkdən ötrü vacibdir. Belə ki, bu zaman Moskvanın çayın cənubundakı qüvvələrini təchiz etməsi çətinləşir.
Ukrayna prezidenti Volodimir Zelenski avqustun 18-də axşam müraciətində deyib ki, Ukraynanın Kurskdakı əməliyyatı "hələ də Rusiya ordusu və dövlətinə, müdafiə sənayesi və iqtisadiyyatına ziyan vurur". O, cəbhədə bütün istiqamətlərdə "yaxşı" nəticələrin olduğunu söyləyib.
Dron və raket hücumları
Bu arada Ukraynanın şərqi Donetsk vilayətində döyüşlər davam edir, Ukrayna tərəfi bəzi ərazilərdə evakuasiya göstərişi verib.
Ukrayna ordusunun baş qərargahı Rusiyanın Rostov vilayətində neft və neft məhsullarının saxlandığı bir obyektin vurulduğunu bəyan edib. Həmin məhsullar Rusiya ordusu tərəfindən istifadə olunur. Baş qərargah ərazidə azı iki yanğının qeydə alındığını açıqlayıb.
Rusiya Müdafiə Nazirliyi ötən gecə Belqorod, Kursk və Rostov vilayətləri üzərində Ukraynanın beş dronunu tutduğunu bildirib. Kiyev adətən dron hücumları barədə şərh vermir.
Kiyev hərbi administrasiyasının başçısı Sergey Popko isə avqustun 18-də deyib ki, Rusiya bu ay Ukrayna paytaxtına üçüncü ballistik raket hücumunu edib. O, Rusiya qüvvələrinin Kiyevə doğru qanadlı raket buraxdığını söyləyib.
Popkonun sözlərinə görə, Rusiyanın Şimali Koreya istehsalı KN-23 raketindən istifadə etdiyi güman olunur.
Azərbaycan BRICS-ə qoşulmaq üçün müraciət edib
Azərbaycan BRICS-ə (təşkilatın adı Braziliya, Rusiya, Hindistan, Çin və Cənubi Afrika Respublikasının adlarının baş hərflərindən götürülüb) daxil olmaq üçün rəsmi müraciət edib.
Bunu Azərbaycan Xarici İşlər Nazirliyinin (XİN) mətbuat katibi Ayxan Hacızadə deyib.
Bu ilin iyulunda "Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə” imzalanıb. Həmin vaxt Azərbaycan tərəfi BRICS-ə daxil olmaq arzusunu ifadə edib və Çin bunu alqışlayıb.
BRICS 2006-cı ildə yaradılıb. Təşkilatın hazırda üzvləri Braziliya, Rusiya, Hindistan, Çin, Cənubi Afrika Respublikası, Misir, Efiopiya, İran və Birləşmiş Ərəb Əmirlikləridir.
Təşkilat yaradılarkən əvvəlcə əsasən iqtisadi məqsədlərdən bəhs edilsə də, indi bəzi təşkilatçı ölkələrin onun fəaliyyətində geosiyasi maraqlar da güddüyü bildirilir
Müxalifət nədən narazıdır?
Lakin Azərbaycanın bir sıra müxalif qüvvələri isə ölkəni Avropa İttifaqında (Aİ) görmək istəyirlər. Azərbaycan Aİ ilə 2009-cu ildə yaradılan Şərq Tərəfdaşlığı Proqramı (Azərbaycandan başqa, Ukrayna, Belarus, Moldova, Gürcüstan və Ermənistan qoşulmuşdu) çərçivəsində əməkdaşlıq edir.
Qurum həmin ölkələrdən bəziləri ilə assosiativ, Ermənistanla isə tərəfdaşlıq sazişi imzalayıb. Azərbaycanla da 2017-ci ildən tərəfdaşlıq sazişinin imzalanması ilə bağlı danışıqlar aparılsa da, hələlik, nəticə yoxdur. Belarus isə Aİ ilə əməkdaşlıqdan çıxıb.
Aİ ilə Azərbaycan danışıqlarının indiyə kimi səmərə verməməsini müxalifət hakimiyyətin gerçək siyasi, iqtisadi islahatlara hazir olmamasi ilə izah edir. Hakimiyyət rəsmiləri isə belə dəyərləndirməni qəbul etmir, ölkənin maraqlarını qoruduqlarını vurğulayırlar.
Naxçıvandan Bakıya gələ bilməyənlərin şikayəti
Son günlər sosial şəbəkələrdə Naxçıvandan Bakıya uçmaq üçün günlərlə Muxtar Respblikanın hava limanında gözlədiklərini bildirən şəxslərin şikayətləri yayılır.
Onlar Naxçıvandan Bakıya qayıda bilmədiklərini qeyd edirlər. Şikayətlərə görə, hərbi xidmətdə əsgərlərin andiçmə mərasimində iştirak etmək üçün Azərbaycanın müxtəlif bölgələrindən Naxçıvan Muxtar Respublikasına getsələr də, oradan geri dönməyə çətinlik çəkirlər. Reyslərin azlığı üzündən hətta hava limanında gecələyənlərin olduğu vurğulanır.
“Elektron formada yox, kağıza yazıb növbə verirlər. Adamlar var ki, 2 gündür Naxçıvan hava limanında yatıb durur”, - deyə şikayətdə bildirilir.
AZAL-dan izah...
“Azərbaycan Hava Yolları” Qapalı Səhmdar Cəmiyyətinin ( QSC) (AZAL) Mətbuat xidmətindən də bildirilib ki, hazırda Naxçıvan Beynəlxalq Hava Limanında ciddi sərnişin sıxlığı müşahidə edilir:
“Bu səbəbdən, Azərbaycanın milli aviadaşıyıcısı AZAL yay mövsümündə intensiv uçuş cədvəlinə baxmayaraq, sərnişinlərin Naxçıvandan Bakıya daşınması üçün bütün zəruri tədbirləri həyata keçirir”.
Habelə bildirilir ki, mövcud vəziyyətin həlli məqsədilə AZAL Naxçıvana əlavə təyyarələr göndərəcək, bu da sərnişinlərin Bakıya çatdırılma prosesini sürətləndirməyə imkan verəcək.
Nacxçıvan Muxtar Respublikası ilə Azərbaycanın qalan ərazilərinin quru sərhədi yoxdur. Türkiyə, Ermənistan, Gürcüstan və İranla quru sərhədləri olan Naxçıvan Muxtar Respublikası ilə Azərbaycanın qalan ərazisi arasında əsasən hava nəqliyyat əlaqəsi var. Avtomobil yolu ilə isə Bakıdan və ya Azərbaycanın başqa bir ərazisindən Naxçıvana gedəcək Muxtar Respublika sakini İran ərazisindən keçməli olur.
‘Abzas Media işi’ üzrə tutulanların ittihamı ağırlaşdırılır
"Abzas Media işi" üzrə digər həbs olunan şəxslərin- nəşrin direktoru Ülvi Həsənlinin, baş redaktoru Sevinc Vaqifqızının, araşdırmaçı jurnalist Hafiz Babalının və reportyor Elnarə Qasımovanın da ittihamları ağırlaşdırılıb.
İstintaq orqanı olan Bakı Şəhər Baş Polis İdarəsi avqustun 19-da onlara qarşı yeni ittihamları irəli sürüb.
Jurnalistlərin vəkilləri deyib ki, onların ittihamları da iqtisadçı Fərid Mehralızadə, AbzasMedia" nəşrinin əməkdaşı Məhəmməd Kekalov və jurnalist Nərgiz Absalamovanın ittihamları kimi eyni qaydada ağırlaşdırılıb.
Vəkillər qeyd edib ki, jurnalistlər ittihamlarla razılaşmır və ittiham barədə sənədləri imzalamaqdan imtina ediblər:
“Onlar heç bir cinayət törətmədiklərini, bu ittihamların onlara aidiyyəti olmadığını və jurnalist fəaliyyətinə görə həbs olunduqları bildiriblər”.
Müdafiə tərəfinin açıqlamasına Daxili İşlər Nazirliyindən münasibət öyrənmək mümkün olmayıb.
Fərid Mehralızadə və Məhəmməd Kekalovun da ittihamı ağırlaşdırılıb
Avqustun 16-da "AbzasMedia işi" üzrə həbs olunan iqtisadçı Fərid Mehralızadəyə qarşı da 7 maddə ilə yeni ittiham irəli sürüldüyü bildirilir. Bu barədə məlumatı onun həyat yoldaşı Nərgiz Muxtarova verib.
Onun deməsinə görə, F.Mehralızadəyə verilən yeni ittihamda yer alan maddələr də Nərgiz Absalamovanın yeni təqsirləndirildiyi maddələrlə eynidir. Söhbət külli miqdarda gəlir əldə etməklə qanunsuz sahibkarlıqdan, bunun mütəşəkkil dəstə ilə törədilməsindən, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir.
Üstəlik, bu iş üzrə təqsirləndirilənlərdən "AbzasMedia" nəşrinin əməkdaşı Məhəmməd Kekalovun da ittihamının eyni qaydada ağırlaşdırıldığı bildirilir.
Nərgiz Absalamovaya ittiham ağırlaşdırılıb
Avqustun 16-da "AbzasMedia işi" üzrə istintaqa cəlb olunmuş jurnalist Nərgiz Absalamovaya qarşı yeni bir çox maddə ilə ittiham irəli sürülüb.
Bu barədə məlumatı jurnalistin vəkili Şəhla Hümbətova yayıb.
"Nərgiz Absalamovaya qarşı Cinayət Məcəlləsinin 192.3.2 (qanunsuz sahibkarlıq - xüsusilə külli miqdarda gəlir əldə etməklə törədildikdə), 193-1.3.1, 193-1.3.2 (cinayət yolu ilə əldə edilmiş əmlakı leqallaşdırma-mütəşəkkil dəstə tərəfindən xeyli miqdarda törədildikdə), 206.4 (qaçaqmalçılıq - mütəşəkkil dəstə tərəfindən törədildikdə), 213.2.1 (vergiləri ödəməkdən yayınma - mütəşəkkil dəstə tərəfindən törədildikdə), 320.1 və 320.2-ci (sənəd saxtalaşdırma və saxta sənədlərdən istifadə etmə) maddələri ilə ittiham irəli sürülüb", - vəkil qeyd edib.
Yeni ittihamlarla şəxsə 12 ilə qədər həbs cəzası verilə bilər.
Hələlik, vəkilin açıqlamasına istintaqı aparan Daxili İşlər Nazirliyi və başqa rəsmi qurumlardan münasibət almaq mümkün olmayıb.
N.Absalamova ötən il noyabrın 30-da "AbzasMedia işi" üzrə ikinci dəfə Bakı şəhər Baş Polis İdarəsində dindiriləndən sonra saxlanılıb. Ona qarşı Cinayət Məcəlləsinin 206.3.2-ci (qrup halında qaçaqmalçılıq) maddəsi ilə ittiham irəli sürülüb və barəsində 3 aylıq həbs-qətimkan tədbiri seçilib. Sonradan bu müddət iki dəfə uzadılıb.
O, ittihamları qəbul etmir.
Əvvəlki maddə ilə isə şəxsə maksimum 8 il cəza nəzərdə tutulur.
Xatırlatma
Ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Onların əvvəlcə çoxu "AbzasMedia işi" ilə əlaqəli olub. Həmin işdə öncə saytın direktoru Ülvi Həsənli, əməkdaşı Məhəmməd Kekalov, baş redaktoru Sevinc Vaqifqızı həbs edilib. Daha sonra bu işə aid həbslər jurnalistlər Hafiz Babalı, Nərgiz Absalamova və Elnarə Qasımova ilə davam edib. Amma onlar ittihamla razılaşmır, bunu peşə fəaliyyətləri və siyasi sifariş ilə izah edirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 250-300 siyasi məhbus var.
Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Putin Azərbaycana gəlib
Rusiya prezidenti Vladimir Putin avqustun 18-də axşam saatlarında Azərbaycana gəlib.
Kremlin mətbuat xidmətinin məlumatına görə, iki gün davam edəcək səfər zamanı müzakirə olunacaq əsas mövzulardan biri “Rusiya-Azərbaycan strateji partnyorluq və müttəfiqliyinin daha da inkişaf etdirilməsi” məsələsi olacaq. Danışıqlar zamanı habelə digər aktual beynəlxalq və regional məsələlərin müzakirə ediləcəyi gözlənilir. Kremlin məlumatında vurğulanır ki, səfərin nəticəsi olaraq birgə bəyanat və bir neçə başqa sənədlər imzalanacaq.
Vladimir Putin Azərbaycanda sonuncu dəfə 2018-ci ilin sentyabrında olub. Həmin səfər zamanı o, cüdo üzrə dünya çempionatı yarışlarına tamaşa edib və Rusiya-Azərbaycan regionlararası forumunun IX plenar iclasına qatılıb.
2 il əvvəl, fevralın 22-də Moskvada Azərbaycan və Rusiya dövlət başçıları iki ölkə arasında “… müttəfiqlik qarşılıqlı fəaliyyəti haqqında Bəyannamə” imzalayıb. Sənəddə iki ölkə arasında siyasi, iqtisadı və daha bir çox sahələrdə əməkdaşlığın inkişafının vacibliyindən bəhs edilir.
Rusiya prezidentinin Azərbaycana indiki səfəri tamam fərqli geosiyasi şəraitdə baş verir.
Azərbaycan və Ermənistan arasında 2020-ci ildə baş vermiş müharibə nəticə etibarilə Bakının ərazi bütvlüklərini tədricən bərpa etməsi ilə başa çatıb. İki ölkə arasında münaqişə ötən əsrin 80-ci illərində yenidən gərginləşən Qarabağ məsələsi üstündə baş verib. 4 il əvvəlki 44 günlük müharibədən sonra Azərbaycanın Qarabağ bölgəsinə üçtərəfli razilaşmaya (Azərbaycan, Rusiya və Ermənistan) əsasən Rusiya sülhməramlı kontingenti yeridilmişdi. Sülhməramlılar Azərbaycanda 2025-ci ilədək qalmalı idilər. Lakin 2023-cü ildə Azərbaycan bir günlük hərbi əməliyyatla Qarabağ üzərində nəzarəti tam bərpa etdi və oradan erməni əhali köç etdi. Bu il isə Rusiya sülhməramlıları Azərbaycanı tərk elədi.
Son illər Azərbaycan və Ermənistan arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələ də, sülh sazişi imzalanmayıb. Azərbaycan-Ermənistan sərhəddində tez-tez olmasa da ara-sıra atəşksəin pozulması ilə bağlı məlumatlar yayılır. Tərəflər buna görə bir qayda olaraq bir-birlərini günahlandırırlar. Bir neçə gün öncə də belə məlumatlar yayılmışdı.
Haaqada mənzillənən Beynəlxalq Cinayət Məhkəməsi (BCM) Ukrayna uşaqlarının Rusiyaya qanunsuz deportasiyasına görə 2023-cü ilin martında prezident Vladimir Putin və Rusiyanın uşaq ombudsmanı Mariya Lvova-Belova barəsində həbs orderi verib. Bu isə o deməkdir ki, BCM-in yurisdiksiyasına daxil ölkələr, o cümlədən Ermənistan onları öz ərazisində həbs etmək öhdəliyinə malikdir. Putin Azərbaycanda həbs oluna bilməz, çünki Bakı BCM-nin Roma statutuna qoşulmayıb.
Putin avqustun 18-19-da Azərbaycana səfər edəcək
Rusiya prezidenti Vladimir Putin avqustun 18-19-da Azərbaycana dövlət səfəri edəcək.
Bu məlumatı Kremlin mətbuat xidmətinə istinadla TASS dövlət xəbər agentliyi yayıb.
Xəbərdə deyilir ki, səfər zamanı müzakirə olunacaq əsas mövzulardan biri də “Rusiya-Azərbaycan strateji partnyorluq və müttəfiqliyinin daha da inkişaf etdirilməsi” məsələsi olacaq.
Danışıqlar zamanı habelə digər aktual beynəlxalq və regional məsələlərin müzakirə ediləcəyi gözlənilir.
Kremlin məlumatında deyilir ki, səfərin nəticəsi olaraq birgə bəyanat və bir neçə başqa sənədlər imzalanacaq.
Putin Azərbaycanda son dəfə 2018-ci ilin sentyabrında olub. Həmin səfər zamanı Putin cüdo üzrə dünya çempionatı yarışlarına tamaşa etmiş və Rusiya-Azərbaycan regionlararası forumunun IX plenar iclasına qatılmışdı.
Bundan sonra Azərbaycan prezidenti İlham Əliyev onu, özünün münasib bildiyi vaxtda Azərbaycana dəvət etmişdi.
Tamam fərqli geosiyasi şəraitdə
Rusiya prezidentinin Azərbaycana indiki səfəri tamam fərqli geosiyasi şəraitdə baş verir.
Azərbaycan və Ermənistan arasında 2020-ci ildə baş vermiş müharibə nəticə etibarilə Bakının bütün ölkə ərazisi üzərində suverenliyini bərpa etməsi ilə başa çatıb.
Bu müharibə dövründə Azərbaycanın Qarabağ bölgəsinə Rusiya sülhməramlı kontingenti yeridilmişdi. Sülhməramlılar razılaşmaya görə Azərbaycanda 2025-ci ilədək qalmalı idilər.
Lakin 2023-cü ildə Azərbaycanın hərbi əməliyyatla Qarabağ üzərində nəzarəti ələ almasından sonra sülhməramlılara praktik ehtiyac qalmamışdı. Bu kontingent bu il, vaxtından xeyli əvvəl Azərbaycandan çıxarılıb.
Rusiya son aylarda Azərbaycan və Ermənistan arasında münasibətlərin normallaşdırılması və sülh müqaviləsinin imzalanması istiqamətində aparılan danışıqlardakı fəal mövqeyini itirib. Hazırda ABŞ və Avropa İttifaqı bu danışıqlarda təşəbbüsü ələ almış kimi görünürlər.
Rusiya Qərbi Moskvanı Cənubi Qafqaz regionundan sıxışdırıb çıxarmaq niyyətində ittiham edir.
Rusiyanın özü də 2022-ci ilin fevralında Ukraynaya tammiqyaslı müdaxilə edəndən bəri Qərblə geosiyasi qarşıdurmamadır və sərt sanksiyalarla üzləşir.
Rusiya ordusunun Ukraynanın Donbas regionunda irəlilədiyi bir vaxtda, avqustun 6-da Ukrayna ordusu da Rusiyanın Kursk vilayətinə müdaxilə edərək müəyyən əraziləri nəzarət altına alıb.
Britaniyalı deputatlar Qubad İbadoğluya azadlıq istəyirlər
Böyük Britaniyadan bir qrup deputat Azərbaycan hökumətini iqtisadçı Qubad İbadoğlunu azad etməyə çağırıblar. London İqtisadi və Siyasi Elmlər Məktəbinin akademiki Q.İbadoğlu hökumətin siyasətini tənqid edən məqalələrdən sonra saxlanılıb. Bu barədə "The Guardian" qəzeti yazır.
Beynəlxalq "Global Witness" qeyri-hökumət təşkilatının prezident İlham Əliyevə göndərdiyi məktubu 25 təşviqat qrupu, Lordlar Palatasının üzvü Alfred Dabs və İcmalar Palatasının səkkiz deputatı imzalayıb. Onlar iqtisadçı alimin qeyd -şərtsiz buraxılmasına çağırırlar. Qəzet yazır ki, alimin vəkillərinə göndərilən məktubda onun məhkəməsinin qeyri-müəyyən vaxtadək təxirə salındığı təsdiqlənir.
"Azərbaycan məhkəmələri bu işi dondurub, istintaq prosesini təxirə salıb və Doktor İbadoğlunu qeyri-müəyyən müddətə girov saxlamağa hazırlaşır. Sizdən onu qeyd-şərtsiz azad etməyə, xaricdə tibbi müalicə almasına icazə verməyə, ailəsi ilə birləşməsinə imkan yaratmağa çağırırıq", – müəlliflər yazırlar.
Bu ilin noyabrında Bakıda BMT-nin COP29 iqlim sammiti keçirilməlidir. Məktubda deyilir ki, Azərbaycan bu konfransı həqiqətən sülh tədbirinə çevirmək istəyirsə, Q.İbadoğlunu dərhal və qeyd-şərtsiz azad etməli, ona qarşı bütün ittihamları ləğv etməlidir.
Xatırlatma
Q.İbadoğlu ötən il iyulun 23-də həbs edilmişdi. O, Cinayət Məcəlləsinin (CM) 204.1-ci (Satış məqsədi ilə saxta pul... və ya xarici valyuta hazırlama, əldə etmə və ya satma - mütəşəkkil dəstə tərəfindən törədildikdə) maddəsi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb. Q.İbadoğlu ittihamları saxta adlandırıb.
Bu il aprelin 22-də onun barəsində seçilmiş həbs-qətimkan tədbiri ev dustaqlığı, daha sonra isə müstəntiqin qərarı ilə polisin nəzarətinə verilmə ilə əvəz olunub.
Q.İbadoğlu dövlət qeydiyyatına alınmayan Azərbaycan Demokratiya və Rifah Partiyasına (ADR) rəhbərlik edib. Amma ev dustaqlığına buraxılandan sonra səhhəti ilə bağlı siyasi fəaliyyətinə fasilə verdiyini açıqlayıb.
Qəbələdə toydan sonra xəstəxanaya kütləvi müraciət olub
Avqustun 15-də Qəbələ rayonunda xəstəxanaya kütləvi müraciət olub. Yerli sakinlərin bildirməsinə görə, səhhəti ağırlaşan insanlar rayonda bir toy məclisində iştirak ediblər. Ümumilikdə 50-dən çox şəxsin səhhətinin pisləşdiyi deyilir.
Azərbaycan Qida Təhlükəsizliyi Agentliyi bildirib ki, hadisənin səbəbləri, onun qida zəhərlənməsi olub-olmaması ilə bağlı mütəxəssisləri və müvafiq qurumların əməkdaşları araşdırmalara başlayıblar.
Hələlik, toy sahibi ilə danışmaq mümkün olmayıb.
Son vaxtlar Azərbaycanda belə oxşar hadisələr tez-tez baş verir.
Avqustun 11-də Gəncə şəhərində xəstəxanaya kütləvi müraciət olmuşdu. Onda isə bir yas mərasimindən sonra yüzdən çox şəxsin səhhətinin ağırlaşdığı açıqlanmışdı.
Antiinhisar araşdırmasını gözləmədən internet qiyməti artırılır
Avqustun 15-də axşam Rəqəmsal İnkişaf və Nəqliyyat Nazirliyinə tabe olan "Aztelekom" dövlət telekommunikasiya provayderi davam edən antiinhisar araşdırmalarına baxmayaraq, fiber-optik (GPON) internet xidmətlərinin yeni tariflərini müəyyənləşdirib.
Yenidən nəzərdən keçirilmiş tariflərə əsasən, minimum trafik sürəti 40 Mbit/s-dən 100 Mbit/s-ə yüksəlib. İndi istehlakçılar ayda 100 Mbit/s üçün 25 manat, 150 Mbit/s-ə 30 manat və 250 Mbit/s-ə 36 manat ödəməlidirlər. Bundan əvvəl 40 Mbit/s sürətli ən aşağı paket 18 manata başa gəlirdi.
Elan Azərbaycan Antiinhisar və İstehlak Bazarına Nəzarət Dövlət Xidmətinin yoxlaması fonunda verilib. Avqustun 14-də qurum "Aztelekom" və "Baktelecom"un tətbiq etdikləri qiymət dəyişikliklərinin yoxlanılmasına başlayıb. Araşdırmada məqsədin provayderlərin hərəkətlərinin Rəqabət Məcəlləsinə və yeni tariflərin hüquq normalarına uyğunluğunu müəyyən etməkdir: "100 Mbit/s-dən aşağı internet sürəti seçmək istəyən müştərilərin seçim imkanlarının məhdudlaşdırılacağı və onların alıcılıq qabiliyyəti nəzərə alınmadan yüksəksürətli internet paketlərinin yüksək qiymətə təqdim olunacağı müəyyən edilib".
Hələlik, məsələyə "Aztelekom" və başqa provayderlərdən münasibət almaq mümkün olmayıb.
Dövlət Statistika Komitəsinin məlumatına görə, hazırda ölkədə 1.6 milyon internet abunəçisi var. Avqustun 15-də bir çox abunəçilər internetin sürətindən şikayətləniblər.
Bundan əvvəl...
Ötən ay ölkə mediasında "Aztelekom" və "Bakı Telefon Rabitəsi"nə istinadən avqustun 15-dən internetin qiymətlərində dəyişiklik olacağı açıqlanmışdı.
Açıqlamada həmin qurumlar bunu müştərilərin yüksəksürətli genişzolaqlı internetə artan tələbatı ilə izah edirlər: "Bu işlər ölkəmizdə dünya trendləri ilə ayaqlaşma, əhalinin yüksək sürətli internetə olan tələbatında artım tendensiyasını nəzərə alaraq, göstərilən xidmətin keyfiyyətinin yüksəldilməsi və dayanıqlı infrastrukturun təmin edilməsi məqsədilə həyata keçirilir".
Həmin vaxt Azərbaycan İnternet Forumunun prezidenti Osman Gündüz isə demişdi ki, hazırda minimal qiymət 18 manat müəyyən olunub və bu ödənişlə vətəndaş 40 Mbit/s sürət əldə edə bilir: "İndi isə minimal 100 Mbit/s üçün 25 manat olacaq. Görünür, provayderlər, o cümlədən dövlət provayderləri bir anda varlanmaq xətti götürüblər. Baxırlar ki, hamı ölkədə qiymətləri qaldırır, düşünüblər ki, onlar niyə etməməlidirlər".
az24saat.org saytının təsisçisi həbs edilib
Avqustun 13-də az24saat.org saytının təsisçisi Vüqar Qurdqanlı (Ələkbərov) saxlanıb.
Daxili İşlər Nazirliyinin (DİN) Mətbuat xidmətindən "Turan"a verilən məlumata görə, o, ayrı-ayrı vətəndaşlara müxtəlif vədlər verərək 100 min manatdan artıq pulu dələduzluq yolu ilə ələ keçirməkdə şübhəli sayılır.
Onun barəsində məhkəmə qərarı ilə həbs-qətimkan tədbiri seçilib.
Vəkil Mehman Muradlı isə hesab edir ki, 178 və 178 2.4-cü (dələduzluq və dələduzluq - xeyli miqdarda ziyan vurmaqla törədildikdə) maddələr ilə Qurdqanlıya qarşı irəli sürülən ittihamlar əsassızdır.
Müdafiə tərəfindən bildirildiyinə görə, o, avqustun 13-də saxlanıb və həmin gün Xətai rayon Məhkəməsi onun barəsində 1 ay 12 gün müddətinə həbs-qətimkan tədbiri seçib. Bu maddələrlə şəxsə 5 ilədək azadlıqdan məhrumetmə cəzası verilə bilər.
az24saat.org hələ 2018-ci ildə Rəqəmsal İnkişaf və Nəqliyyat Nazirliyinin Elektron Təhlükəsizlik Xidmətinin şikayəti əsasında Bakının Səbail rayon Məhkəməsi qərarı ilə bloklanıb. Buna səbəb kimi saytda ölkə qanunvericiliyinin tələblərinin pozulduğu yazıların dərci göstərilib. Sayt rəhbərliyi isə bunu düzgün saymayıb.
Bundan sonrakı dövrdə Qurdqanlı sosial şəbəkələrdə materiallar dərc edirdi. Onun yazılarında hökumətə və dövlət orqanlarına qarşı tənqidlər yer alırdı.
Azərbaycanın yerli hüquq müdafiəçilərinin hazırladıqları siyahılara görə, ölkə həbsxanalarında hazırda 300-ə yaxın siyasi məhbus var. Amma rəsmilər, ümumiyyətlə, ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, siyasi məhbus siyahılarında yer alanlar sırf törətdikləri əmələ görə məsuliyyətə cəlb ediliblər.
Qardaşı: 'Ələsgər Məmmədlinin hüquqlarından istifadəsinə imkan verilmir'
Yaxınları ToplumTV-nin təsisçisi Ələsgər Məmmədlinin həbsdə hüquqlarının pozulduğunu deyirlər. Onların bildirməsinə görə, Ə.Məmmədli istintaq təcridxanasında dərman qəbul etsə də, qan təzyiqini sabitləşdirmək mümkün olmur.
Bu barədə qardaşı Nəsimi Məmmədli bildirib.
"Ələsgər Məmmədlinin qapalı məkanda saxlanılması ona bir sıra ciddi problemlər yaradıb. Qalxanabənzər vəz şişi hələ də nəfəs almağı çətinləşdirir", - o deyib.
Yaxınlarının sözlərinə görə, onun şəxsiyyət vəsiqəsini istintaq orqanı götürüb. Onların vurğulamasına görə, Ə.Məmmədli vergi hesabatından ötrü yeni "Asan İmza" almaq üçün də yaxınlarına etibarnamə verməlidir.
"Lakin cəzaçəkmə yerlərində saxlanılan şəxslərin hüquq və azadlıqları haqqında qanunu pozaraq onun yanına notariusu buraxmırlar", - N.Məmmədli əlavə edib.
Onun deməsinə görə, etibarnamə həm də Ə.Məmmədlinin iki övladının ali təhsil xərclərini ödəmək üçün avtomobilini satmasından ötrü lazımdır və ailə maddi çətinlik çəkir.
Yaxınları Ə.Məmmədlinin hələ həbsindən öncə səhhətində problemlərin olduğunu açıqlayıblar.
Hələlik, qardaşının bu açıqlamasına Penitensiar Xidmət və istintaqı aparan Daxili İşlər Nazirliyindən münasibət almaq mümkün olmayıb.
Xatırlatma
Ə.Məmmədli bu il martın 8-də həbs olunub. Ona qarşı Cinayət Məcəlləsinin 206.3.2 (qaçaqmalçılıq) maddəsi ilə ittiham verilib. O, ittihamı qurama sayır.
Ötən ilin noyabrından Azərbaycanda aralarında ToplumTV, habelə "AbzasMedia" nəşrinin əməkdaşları da olmaqla qruplar halında 20-yə qədər jurnalist, ictimai fəal qaçaqmalçılıq ittihamı ilə həbs edilib.
Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə siyasi sifarişlə basqılara məruz qalmır.
Fazil Mustafaya sui-qəsdə görə ömürlük həbs cəzası kəsildi
Deputat Fazil Mustafaya sui-qəsddə suçlanan şəxslərdən birinə – Azər Səricanova ömürlük həbs cəzası verilib. Avqustun 13-də Bakı Ağır Cinayətlər Məhkəməsində belə hökm çıxarılıb.
Eyni hökmlə bu olayda təqsirləndirilən daha dörd nəfərdən Səbuhi Şirinova 20 il, Rəşad Əhmədova 19 il, Elşad Əsgərova 18 il, Emin Əliyarova isə 4 il həbs cəzası kəsilib.
Təqsirləndirilən şəxslər və onların ailələri narazı qaldıqlarından hökmdən apellyasiya şikayəti verəcəklər.
Xatırlatma
Ötən il martın 28-də axşam saatlarında paytaxtın Sabunçu rayonundakı Zabrat qəsəbəsində yaşadığı evin önündə Fazil Mustafa atəşə tutulub. Deputat çiyin və bud nahiyəsindən yaralanıb.
Olay üzündən beş nəfər - Azər Səricanov, Elşad Əsgərov, Səbuhi Şirinov, Emin Əliyarov və Rəşad Əhmədov cinayət məsuliyyətinə cəlb edilib.
Cinayət işində iddia olunur ki, F.Mustafaya sui-qəsd planı İranın Rey şəhərində müzakirə olunub. Həmin planın icrası barədə tapşırıq verilib və Bakıya bundan ötrü 30 min dollar pul göndərilib.
Təqsirləndirilən şəxslərə dövlətə xəyanət, terrorçuluq, dövlət xadiminin həyatına sui-qəsd də daxil, bir sıra ağır ittihamlar verilib.
Onlar özlərini qismən təqsirli bilirlər. Deputatı vurduqlarını təsdiqləsələr də, bu olayın İrandan gələn sifariş olmadığını deyirlər. Təqsirləndirilən şəxslər vurğulayıblar ki, deputatı öldürmək niyyətləri olmayıb, onu dini mövzuda səsləndirdiyi fikirlərə görə cəzalandırmaq istəyiblər. Elə bu üzdən, F.Mustafanın həyati önəmli orqanlarına deyil, çiyin və ayağına atəş açdıqlarını vurğulayırlar.
Yaxınları Emin İbrahimovun aclıq aksiyasını dayandığını deyirlər
Keçmiş diplomat Emin İbrahimovun Şüvəlan İstintaq Təcridxanasında 20 gündür davam etdirdiyi aclıq aksiyasını bugün, avqustun 12-də dayandırdığı bildirilir. Yaxınlarının sözlərinə görə, bu barədə o, telefon söhbətində qeyd edib.
Amma bu məlumata, hələlik, Penitensiar Xidmətdən münasibət almaq mümkün olmayıb.
Öz növbəsində, Siyasi Menecment İnstitutunun direktoru Azər Qasımlı da deyib ki, İbrahimov aclığı ailə üzvlərinin, qohumlarının, dostlarının və həmfikirlərinin israrlı xahişlərindən sonra dayandırıb.
"Biz bundan əvvəl də Emindən aclığı dayandırmağı xahiş edirdik, lakin o, israrla aksiyanı davam etdirirdi. Bu dəfə biz onu inandırdıq ki, o, mübariz adamdır və işini davam etdirmək üçün sağlam olmalıdır", - deyə Qasımlı bildirib.
Penitensiar Xidmət keçmiş diplomata həbsdə təzyiq olmadığını deyir
Penitensiar Xidmət həbsdə olan keçmiş diplomat Emin İbrahimova təzyiq edilməsi ilə bağlı onun vəkili vasitəsi ilə açıqlamasına münasibət bildirib.
Qurumdan “Turan” Agentliyinə deyilib ki, Emin İbrahimov barəsində cinayət işinin başlanmasına etiraz əlaməti olaraq aclıq etməsi ilə bağlı ərizə ilə iyulun 28-də nahardan sonra aidiyyəti üzrə müraciət edib:
“E.İbrahimovun yaxın qohumları ilə görüş hüququ məhdudlaşdırılmayıb, telefonla danışmaq hüququndan istifadə edib. Ona qarşı təzyiqlərin olması barədə iddia isə həqiqəti əks etdirmir. Belə ki, o işçi heyəti, həbs edilmiş şəxslər tərəfindən təzyiqlərə, işgəncələrə məruz qalmır, hüquqları və qanuni mənafeləri qorunur”.
Bugün, iyulun 30-da isə vəkili Bəhruz Bayramov onunla görüşüb. Vəkil qeyd edib ki, İbrahimov 15 məhbusun olduğu kameradan ayrı kameraya köçürülüb:
“Hazırda İbrahimov tək saxlanılır, ancaq onu tibbi nəzarətə götürməyiblər.”
Emin İbrahimovun apellyasiya şikayəti təmin edilməyib
Bundan bir gün əvvəl, iyulun 29-da keçmiş diplomat Emin İbrahimovun həbsi ilə bağlı məhkəmə qərarından verilən apellyasiya şikayətini Bakı Apelyasiya Məhkəməsi təmin etməmişdi.Vəkili Aqil Layıc bildirmişdi ki, E.İbrahimov artıq 6 gündür 3 saylı İstintaq Təcridxanasında aclıq aksiyası keçirdiyini deyir.
Onun sözlərinə görə,Emin İbrahimov vurğulayır ki, 15 nəfərin olduğu kamerda saxlanır, aclıq aksiyasını dayandırmaq üçün müəssisə rəhbərliyinin təzyiqlərinə məruz qalır.
Vəkil habelə qeyd edib ki, E.İbrahimova telefonla danışmaq və ailə üzvləri ilə görüşməyə də qadağa qoyulub.
Keçmiş diplomat, ictimai fəal Emin İbrahimov iyulun 22-də saxlanıb. Ona Cinayət Məcəlləsinin 126.2.4 (xuliqanlıq niyyəti ilə sağlamlığa qəsdən ağız zərər vurmaq) və 221.-cı (xuliqanlıq) maddələri ilə ittiham elan edilib.İyulun 24-də barəsində 4 aylıq həbs-qətimkan tədbiri seçilib.O bir şəxsi bucaqla vurmaqda ittiham edilir.Amma ittihamı qurma sayır.
E.İbrahimov Azərbaycanın Birləşmiş Ştatlardakı səfirliyində və başqa qurumlarda çalışıb. Onun 2020-ci ilin fevralında Azərbaycandakı parlament seçkilərini özü üçün "son damcı" sayaraq martın 13-də ovaxtkı xarici işlər naziri Elmar Məmmədyarova istefa ərizəsi yazdığı bildirilir. Bu həftə E.İbrahimovun saxlanmasından sonra onun yazdığı bildirilən ərizənin fotosu sosial şəbəkələrdə yayılıb.
ATƏT Demokratik Təsisatlar və İnsan Haqları Bürosu (DTİHB) 2020-ci il seçkilərində həqiqi rəqabətin qarşısının alındığını, həqiqi siyasi müzakirələrin olmaması səbəbindən seçicilərə "mənalı" seçim imkanı verilmədiyini bildirib.
Rəsmilər isə həmin seçki ilə bağlı tənqidləri qəbul etmir.
Gəncədə xəstəxanaya kütləvi müraciət olub
Tibbi Ərazi Bölmələri İdarəetmə Birliyindən (TƏBİB) avqustun 12-si, günorta saatlarında bildiriblər ki, Gəncədə zərərçəkmişlərə operativ tibbi yardım göstərilib və onlar ambulator müalicəyə buraxılıblar: "Hazırda 15 nəfər, o cümlədən üç uşaq xəstəxanadadır".
+++
Avqustun 11-də Gəncə şəhərində xəstəxanaya kütləvi müraciət olub. Müraciət edənlər həyətlərin birində yas mərasimindən sonra səhhətlərinin pisləşdiyini bildiriblər. Həmin şəxslər halva, bozbaş və pomidor-xiyar salatı qəbul etdiklərini deyiblər.
Müraciət edənlər ümumilikdə 100-dən çox olub. Göygöl rayon Mərkəzi Xəstəxanasından onlardan bir neçəsinin vəziyyətinin ağır olduğu qeyd edilib.
Qida Təhlükəsizliyi Agentliyindən verilən məlumata görə isə, mütəxəssisləri bölgəyə göndəriblər, baş verənlərin səbəbləri araşdırılacaq.
Hələlik, baş verənlərlə bağlı yas mərasiminin sahibi ilə danışmaq mümkün olmayıb.
Müdafiə Nazirliyinin daha bir polkovniki həbs edilib
Müdafiə Nazirliyinin Mənzil İstismar İdarəsinin sabiq rəisi Elmar Məmmədov həbs edilib. Onun haqqında həbs qərarı avqustun 9-da Bakı Hərbi Məhkəməsində çıxarılıb.
E.Məmmədov 659 min 442 manatı mənimsəməkdə və rüşvət almaqda ittiham olunur. Onunla bağlı cinayət işinin istintaqı Hərbi Prokurorluqda gedir.
Hərbi prokuror E.Məmmədovun istintaq dövründə həbsdə saxlanmasından - ilkin olaraq, 4 aylıq həbs qətimkan tədbiri seçilməsindən ötrü məhkəməyə təqdimat verib. Məhkəmə də avqustun 9-da axşam saat 6.00 radələrində təqdimata baxaraq, onu təmin edib.
E.Məmmədov təxminən iki həftə öncə həbs edilən Rəhim Laçınovla əlbirlikdə ittiham edilir. R.Laçınov Mənzil-İstismar İdarəsinin Əsaslı və Cari Təmir bölməsinin rəisi olub.
Cinayət işində iddia edilir ki, E.Məmmədov 2020-ci ilin əvvəlində Mənzil-İstismar İdarəsinin rəisi olduğu dövrdə R. Laçınovla birlikdə külli miqdarda yeyintiyə yol veriblər.
E.Məmmədov özünü təqsirli bilmir, yarım milyon manatdan çox yeyinti ittihamıyla razılaşmır.
E.Məmmədov və R.Laçınova Cinayət Məcəlləsinin 179.4-cü (xüsusilə külli miqdarda mənimsəmə) maddəsilə ittiham verilib. Bu maddədə 10 ildən 14 ilədək həbs cəzası nəzərdə tutulub.
Cinayət Məcəlləsinin 311-ci (rüşvət alma) maddəsilə E.Məmmədova əlavə ittiham da verilib.
Müdafiə Nazirliyi Mənzil-İstismar İdarəsinin bundan öncəki rəisi Fikrət Mirzəyev də həbsdədir. O, Müdafiə Nazirliyində 143 milyon manatlıq mənimsəməyə dair cinayət işi üzrə həbs olunub. Hazırda Bakı Hərbi Məhkəməsində onun mühakiməsi davam edir.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
Ətraflı məlumat üçün bura klikləyin.